上周往中央圖書館演講應出席一個升小一講座，臨走前很多家長前來發問，其中一個說：「趙Sir，我有兩個仔，佢哋只相差一歲，成日在家嘈喧巴閉，我想俾個細仔留級一年，等佢哋讀書有兩年差距，唔知咁樣做好唔好？」
「點解你有個咁嘅諗法？」聽到該家長用這樣一個方法，我感到有些不安，因為這個「為一個而犧性另一個」嘅方法，觸到我的底線。
「佢兩個一個讀K2，一個讀K3，一日到晚為書本上的問題吵鬧，令我哋覺得好煩，我哋諗，叫細仔留一年K2，大仔升上小一會唔會好啲？因為咁樣便有兩個學年的差距！」
「表面睇落好似係，但實際上你仍未真正解決佢哋兩個嘈吵問題；事實上，有好多相差一歲的兄弟，相處得非常和睦，個核心問題是『兄弟之爭』sibling rivalry，解決了核心問題便不用叫個細仔留班了，此其一；還有，我是不贊成『為了大局而犧牲一個仔』的做法的…」
「我冇犧性一個仔呀！」家長答。
「你叫個細仔無端端留級一年，這樣做便叫做「犧性」，為甚麼要佢咁做？因為你想佢哋兩兄弟和睦相處，這便是為了大局。為甚麼我不贊成咁做？因為將來有一日，個細仔可能發覺爸媽細個時曾經搵佢做「犧性品」，佢一定會覺得你哋偏心，咁樣你哋便有排同佢解釋了！」
「明白，我哋似乎把握錯了重點，應該解決「兄弟相爭」這問題而不是相差一級這問題，謝謝趙Sir！」家長滿意而去。
其實家長很多時候用「棄車保帥」這方法來解決問題而不知。其中一個經典例子：一個家長有兩個兒子，一個讀名校六年級，一個讀K3 ( 下一年入小一 )。正常情況，下一年個大仔由六年級升上中學，細仔便不能直升小一，因為跟據指引，兄要讀小學，弟才會必入小學。為了必入，媽媽便叫兄留班，即時留讀小六一年，但這事被校長發覺，揭穿家長詭計，不淮家長犧性哥哥，要他升上中一，這樣弟弟便不能直升！
從以上個案，可知「棄車保帥」或「棄車保局」絕對不是解決這種問題的好方法。
作者：趙榮德校長
前喇沙書院副校長，香港輔導教師協會榮譽顧問；香港大學專業進修學院客席講師。著作約有廿二本，包括最新出版的2018/19「尋找免費優質幼稚園」及「小學選校一本通」等；更在「趙Sir之友Facebook」發放升學、親子文章：www.facebook.com/趙Sir之友
