在新冠狀病毒疫情影響下，不少幼兒園的學前預備班〈PN班〉入學面試紛紛「變招」，由「面對面」的面試改為拍短片，有家長收到要拍短片的信，走來向我「求救」，以下為本人和家長的談話內容，想替子女申請N班的家長，宜細讀應對方法。
家長：趙Sir，我今年幫個仔報PN班，我聽講好多幼兒園因為疫情影響，紛紛取消面試，用拍片代替，銅鑼灣維多利亞要家長為小朋友拍攝一段一分半鐘的短片，內容主要係反映小朋友日常生活的真性情、題材、內容由家長自由發揮，校方會就家長提交的短片作評估，然後篩選合適的申請人進入次輪面試……
趙Sir：面試？
家長：不是正常面試，喺「視像會議」會談。我冇幫個仔報維多利亞，我報嗰間要求家長做兩件事，一、是拍一段5至7分鐘短片；二、是用300字短文介紹短片內容，學校似乎就用呢個短片同300字短文，決定是否收個小朋友。
趙Sir：可能維多利亞多啲人報，要用短片篩咗第一批人，你申請嗰間比較直接了當，「一片定生死」，你會點拍呢個短片？
家長：我第一個想法，就係模仿真嘅面試咁拍：用三分鐘俾個仔自我介紹；用兩分鐘俾個仔同我傾計，然後用餘下兩分鐘同我玩。
趙Sir：時間分配好重要，要記住一個重點，時間分配多少要配合你個仔嘅強弱，如果你個仔歲幾剛剛識講野，就唔好俾三分鐘佢自我介紹啦，至多比一分鐘講「我叫陳小明，英文名喺Paul，今年一歲兩個月，我鍾意唱歌」已經夠啦！
家長：我個仔真係好似你咁講，啱啱識講你頭先講果句。好啦，如果只用一分鐘介紹，咁點樣分配剩低果五、六分鐘？
趙Sir：你可以用「1,2,2,2」四分法，一分鐘介紹、兩分鐘傾計、兩分鐘玩、最後兩分鐘一家人牀上講故事，咁嘅安排，都幾好，你認為呢？
家長：好，內容又如何？我意思係傾乜、玩乜講乜？
趙Sir：其實「1,2,2,2」四分法是假設呢家人有一個作息表〈schedule〉，包括 Floor Time 傾計時間，Play Time 遊戲時間同埋 Bed Time Story 牀邊故事時間。
家長：你意思是第2個兩分鐘係爸爸媽媽同個仔傾計，講果日開心、值得感恩嘅事情；第3個兩分鐘就一齊玩，砌圖、唱歌嘅時間；第4個兩分鐘是牀邊講故事嘅時間？
趙Sir：完全正確，用「1,2,2,2」四分法，有一條主條連貫你哋家庭，就係你哋做家長嘅好重視大家嘅感情，識得用一個作息表來養成家人有時間溝通，有時間一齊玩耍，一齊學習。幼稚園校長見到小朋友嘅家長，咁重視同子女維持感情，養成良好生活習慣，一定給小朋友一個機會。
家長：完全同意，我知道點拍條短片同點樣寫段文字啦，多謝趙Sir指點！
