小一「自行分配派位」落空後的部署

自行分配學位已於11月22日公布結果，亦於11月24至25日辦理註冊手續，統一派位於翌年一月下旬才開始辦理選校手續，究竟在這空檔時間，做甚麼好？以下為一位「自行分配學位」落空的家長和我的對話：

家長：趙sir，想知道「自行分配」派位落空，搵人寫介紹信有冇用？
趙Sir：而家寫冇用，六月統一派位寫才有用。

家長：點解？
趙Sir：因為而家小學校長手上冇學位。

家長：唔明。
趙Sir：試過有一次，有朋友走來叫「救命」，佢話佢請心儀小學嘅校監寫信交俾校長，「自行分配」放榜竟然失敗，我幫佢深入調查，發覺整個小一派位過程，校長完全置身局外，直至六月「統一派位」放榜後，教育局先至將剩餘的學位交回校長，俾佢用「叩門」方式收生。所以你而家就算寫信俾校監、校董，佢哋都「無計」，至到六月，佢哋有學位在手先至「應酬」你，明白未？

家長：明白，即是信而家交冇用，要六月「統一派位」放榜後先至有用！咁而家去心儀嘅小學「叩門」有冇用？
趙Sir：冇用。頭先我都強調過而家校長手上冇學位，你見佢係費時失事。

家長：咁可否出去報讀直資私小？
趙Sir：當然可以，不過報讀直資私小要交學費，此其一，直資私小未必好過官津小學，例如直資有小拔、小女拔，官津有喇小、瑪利諾、聖瑪利等，此其二，而且直資收咗你個仔女，便不能再報官津小學，此其三；況且名直資唔容易入，除非你一早有報讀直資嘅心意，否則，因為失望、空虛而報直資來填補這空虛不太「健康」！

家長：明白。但我個仔有25分入唔到名小學，我好焦慮、好心急，目前有乜可以做？
趙Sir：我試過有家長好似你咁，放榜後第二日打電話向我求救，話25分，係天主教徒及舊生，竟然入唔到，我叫佢六月去叩門，舊生25分有八、九成機會，但家長不肯收線，堅持要我教佢一個方法，我唯有叫佢「祈禱」，如果全家是天主教徒，便全家一齊祈禱，佢聽到問我這個是否是最後一招，我話係，佢多謝我便收線。

家長：結果點樣？
趙Sir：結果翌日家長話一早收到學校電話，話有一個學位剩，問佢要唔要，佢立即叫太太同個仔飛車到學校註冊，原來有個學生移民，所以俾佢「執」到學位。不過，我要聲明，唔係個個都咁夠運，但祈禱，在無辦法下，都算係一個辦法。

家長：明白，除了祈禱，仲有冇其他辦法？
趙Sir：有，係搬屋，做「孟母」，不過呢個辦法遲啲才傾，因為距離一月仲有成個月時間。

家長：好，遲些再請教趙sir，多謝趙sir咁生動嘅介紹！
趙Sir：希望幫到你！

作者：趙榮德校長
前喇沙書院副校長，香港輔導教師協會榮譽顧問；香港大學專業進修學院客席講師。著作約有廿二本，包括最新出版的2018/19「尋找免費優質幼稚園」及「小學選校一本通」等；更在「趙Sir之友Facebook」發放升學、親子文章：www.facebook.com/趙Sir之友